深水埗嘅外賣平台
埗兵咖啡渣之旅
一步一步，由cafe到農田，將城市同鄉郊，以新嘅循環方式建立連繫
點解我哋要收渣?
改善土壤質素
地球上可以種植嘅土壤不斷流失，每1分鐘就有30塊足球場大嘅土地無法再種植。土壤污染原因有好多，包括工業污染物排放、過度使用農藥等等。
點樣幫到土壤回復健康嘅狀態呢? 其中一個方法就係增加有機物，例如廚餘。咖啡渣可以話係城市裡面最乾淨同易處理嘅廚餘之一，我哋就喺社區收集咖啡渣，再同農場合作，做咖啡渣堆肥，為土壤增值。
我哋每星期會做咩?
01
收集
我哋同深水埗區內嘅cafe合作，每星期拖車仔收集咖啡渣同廚餘，由開始時一個外賣飯盒嘅量，到而家一星期會收集到約50kg。
收集後需要進行唔同處理
濾紙: 濾紙同咖啡渣分開後，我哋會將濾紙清洗乾淨後交到 mil mill 喵坊，佢會用回收紙漿製造廁紙。
蛋殼: 收集後，我哋會清洗同炒乾，連同咖啡渣一齊交俾農場。
廚餘: 用密封容器裝好，再交俾農場。
02
堆肥
返到農場，農夫會將咖啡渣同蛋殼，連同枯枝枯葉同新鮮菜葉等，逐層咁堆放，經過微生物降解之後，咖啡渣同蛋殼就會釋放出鉀、氮、鎂、鈣等豐富嘅營養，同時提升土壤有機質，改善泥土質素。
堆肥需放置最少兩個月，降解期間會產生熱能，亦都要定時咁翻堆。未夠時間嘅堆肥係會燒傷植物根部又或者令植物缺氧㗎。到堆肥熟成嘅一刻，深水埗咖啡渣就正式回歸到大自然喇。
我哋同邊個合作?
Cafe
感謝以下嘅cafe參加埗兵咖啡渣回收計劃，希望大家經過深水埗可以多多支持佢哋!
- Buff 不苦
- Kokoni
- Lonely Paisley
- Loop Kulture
- So Coffee & Gin
- The Soulroom 一草一木
- Years / The Park
- 昌盛茶餐廳
- 黑窗里
有興趣參與計劃嘅cafe都歡迎留低聯絡俾我哋!
農場
感謝以下嘅農場，一開始有香港歐羅有機農場大大力支持我哋先展開到成個計劃，慢慢有其他農友一齊幫手。
- 歐羅有機農場
- 菇菌圓
- 香城遺菇
- 農友W
我哋會繼續努力搵唔同嘅團體研究堆肥，發掘更多可能性，例如點樣用蚯蚓幫手分解咖啡渣。
深水埗區本地菜共購
每次我哋都會趁運咖啡渣去農墟，買埋歐羅菜同孖陳記嘅花草茶返屋企。獨樂樂不同眾樂樂，索性整個telegram共購群組，叫埋街坊一齊食靚菜。
歐羅有機農場有提供月購計劃俾大家訂菜，而深水埗街坊想同埗兵買菜，歡迎加入埗兵本地菜群組。
- 星期五群組內開放預訂，星期日交收
- 可以揀魚鈁交收 / 埗兵外賣搭送菜
- 外賣送到深水埗、長沙灣、太子、石硤尾、大角咀、茘枝角等等
- 我哋會用環保見習生提供嘅回收雪袋分裝大家嘅菜
